مظبخ:

 رہائشی طلبہ کے لیے خوردو نوش کا مکمل انتظام جامعہ کی طرف سے ہوتا ہے ۔بحمدللہ یوم تاسیس سے ہی بانی و صدر جامعہ قدس سرہ  نے مہمانان رسول کے اکرام میں اس مد کو غیر زکوٰتی قرار دے کر آغاز فرمایا تھا۔ تمام طلبہ کو دو وقت کا معیاری کھانا اور بہترین ناشتہ۔ نیز مریض طلبہ کو ہمہ وقت پرہیزی کھانا بھی فراہم کیا جاتا ہے۔ اس شعبے کے نگران و ذمہ دار جامعہ کے استاد الحدیث حضرت مولانا امیر احمد حفظہ اللہ ہیں۔ جبکہ جامعہ کے فاضل مولوی عبدالرؤف صاحب حفظہ اللہ معاون ہیں۔

 مالیات:

 جامعہ کا سالانہ بجٹ دو کروڑ روپے سے متجاوز ہے ۔یوٹیلٹی بلز، رہائشی طلبہ کے لیے خوردو نوش، اساتذہ کرام و کارکنان کے مشاہرات مستقل مدات ہیں۔ بحمدللہ اکابر کی نسبتوں کے امین ادارے میں امت المسلمین کے عطیات کی ایک ایک پائی کا مکمل حساب رکھا جاتا ہے اور مدات کی تصریح کے ساتھ نہایت احتیاط سے خرچ کیا جاتا ہے۔ اس کے ذمہ دار محترم جناب الحاج شیخ محمد سلیم صاحب زیدمجدہ   ہیں ۔

 کتب خانہ:

پندرہ ہزار  سے زائد کتب پر مشتمل یہ کتب خانہ اندراج و اجرا کے مضبوط نظام کے ساتھ ہر صاحبِ ذوق کے لیے لائق دید و استفادہ ہے۔ سالانہ پڑتال ،کتب کی حفاظت ،نادر و نایاب نسخوں ،مخطوطوں اور کتابوں کی فراہمی سے یہ مکتب نہایت قیمتی خزانہ بن گیا ہے۔

 دارالافتاء:

 عامۃ  المسلمین کی  دینی وشرعی رہنمائی کے لیے مستند مفتیان کرام کی نگرانی میں یہ شعبہ مصروف عمل ہے ۔بالمشافہ، تحریری اور زبانی ہر طرح سے دینی رہنمائی فراہم کرتا ہے۔

 علوم الحدیث:

 جامعہ کا انتساب جس عظیم ہستی کے ساتھ ہے ان کی اور جملہ اکابر علمائے دیوبند قدس اللہ اسرارہم کی خدمات حدیثیہ کو اجاگر کرنا ۔نیز قحط الرجال کے دور میں رجال حدیث اور علم حدیث کی آبیاری اس شعبے کا بنیادی مقصد ہے ۔اکابر کی وقیع  تصنیفات پر اس شعبے میں تخریجی ،تصنیفی اور تحقیقی کام شبانہ روز جاری ہے۔ مضبوط اصحابِ علم پر مشتمل جماعت اس کا نظم سنبھالے ہوئے ہے۔

 شعبہ کمپیوٹر:

 تخصص کے تمام اور درسِ  نظامی کے چنیدہ طلبہ کو اس کے تحت کمپیوٹر کی ضروری تعلیم دی جاتی ہے۔ جامعہ کے تمام اشاعتی  امور یہ شعبہ سر انجام دیتا ہے ۔دعوت نامے ،اشتہارات ،تحریرات و تصنیفات کی کمپوزنگ ڈیزائننگ اسی شعبے سے انجام پاتی ہے۔ جامعہ کے قدیم استاد مولانا محمد صاحب حافظہ اللہ اس کے نگران و ذمہ دار ہیں۔

 فیض شیخ ٹرسٹ:

 ملک کے طول و عرض میں حادثاتی حالات میں مخلوق ِخدا کی دادرسی اور خدمات کے لیے 2010 ءمیں بانی و صدر جامعہ نے اپنے شیخ و مرشد کی طرف منسوب یہ ادارہ قائم فرمایا۔ سیلاب 2010ء، لاک ڈاؤن کرونا وائرس 2020 ء،اور سیلاب 2022 ءمیں بانی و صد ر  جامعہ رحمہ اللہ اور ان کے فرزند مولانا مفتی انیس احمد مظاہری مد ظلہ  بنفسِ نفیس شریک ہو کر عامۃ المسلمین کی امانتیں مستحقین تک پہنچاتے رہے۔ عذرو علالت کے باوصف ہر دو حضرات نے اسفار فرمائے اور میدان ِعمل میں اتر کر نہایت محنت و جان فشانی سے خدمات سر انجام دیں۔

 مجلس منتظمہ وسر پرستان :

بحمدللہ روز اول سے ہی اکابر قدس اللہ اسرارہم کے مسلک و مشرب اور منہج کے عین مطابق مدرسہ کا مکمل نظام شورائی ہے۔ اصحاب ِقلوب اور اہل اللہ پر مشتمل 12 رکنی جماعت ادارے کی باقاعدہ مجلس منتظمہ ہے ۔ہر ماہ مشورہ اور فیصلوں کی منظوری یہی جماعت دیتی ہے۔

لطف بلائے لطف یہ کہ اس جماعت پر عالم اسلام کے چنیدہ اہل اللہ اور مشائخ عظام علماء کرام کا ہاتھ ہے۔ یہ مجلس سرپرستان ہے اس میں حضرت شیخ الحدیث نور اللہ مرقدہ کہ ممتاز خلفاء و متوسلین اور منتسبین کی با اختیار شمولیت قابل ذکر ہے ۔حضرات سرپرستان کا سالانہ اجتماع بھی انعقاد پذیر ہوتا ہے ۔خدمات کا مشاہدہ اور کارگزاری ملاحظہ فرما کر اہم امور کی منظوری دی جاتی ہے۔